Visualizzazioni totali

RUBRICA ...ZODIACALE NAPOLETANA

Il primo è l'Ariete 
 O' sòle quànno tràse dìnt' all'Ariète addiventa friccicarièllo, se vò fa sentì; e chille ca nàsceno dint' 'a 'stu segno, pure llòro sò 'nfurnucùse assaje; comme v' àggia dìcere... "Tèneno 'o ppépe 'nculo!" Ammore: ~ Pe' lloro ll'ammòre è tale e quale 'a guerra; sèmpe 'na battaglia nova; nun pe nniènte tèneno 'o ffuoco! 

 IL SECONDO SEGNO DELLO ZODIACO NAPOLETANO 
 Toro: 20 aprile ~ 20 maggio. "Nce vò 'a paciènza dicette don Viciènzo!" E 'o Toro ne tene assaje 'e paciènza, però nunn'o facìte 'ncazzà, sinnò s'accummògliene ll'uòcchie, e nun vede niente cchiù! ... Tene 'a capa tosta, e si se mette coccosa 'ncapa, chianu chiano se nne và, ma 'o scopo sujo add' arrivà. Ll'ammore d' 'o Toro è pe' ssempe; tuccàtece tutte cose, ma no 'a famiglia. 

 IL TERZO SEGNO DELLO ZODIACO NAPOLETANO 
 Gemelli (21 maggio - 20 giugno). Chistu ccà è 'nu segno 'nu poco distratto; sta sempe cu 'a capa ammièzo 'e nnùvole, ma si 'o date 'a parlà nunn 'a fernesce cchiù, v' accatta e ve venne senza ve ne fa addunà. Chi è nnammurato d' 'o Gemelli, nun adda fa caso si se scorda 'e cocc' appuntamente, pecché isso, è 'nu poco scurdarièllo; nun te ‘ncazza’ nun ne vale ‘a pena 

 IL QUARTO SEGNO ZODIACALE NAPOLETANO 
 Cancro (21 giugno - 22 luglio) Nun ce sta niente 'a fà; nunn 'o facìte fesso! Primm'ancora ca vuje parlate, 'o Cancro già 'o ssape chello ca vulìte dìcere. S'arricòrda sempe d' 'o passato, e ve fà 'na capa tanto. E' 'na perzona quièta e vò bbene 'a famiglia, basta ca 'o facìte ddòje ciange, e chillo nun ve lassa cchiù. Ma..quanno se ‘ncazza…fuitevenne! 

 IL QUINTO SEGNO ZODIACALE NAPOLETANO 
 Leone (23 luglio - 22 agosto) Aligante, attiggiùso, nunn è ‘mmiriùso. E pè ffòrza ìsso è 'o rrè! Ma si n' avìte bisogno v' 'o truvate, e si avìte organizzà quacche cosa, 'o putite chiammà, ca isso, ve risolve. Tutto se po' dìcere d' o' Lione, ma no ca è tirchio. Quanno vò bbene a cocchedùno 'o régne 'e rigale e attenziune… Facitive n’amico d’ ‘o lione! 

 IL SESTO SEGNO ZODIACALE NAPOLETANO 
 Vergine (23 agosto - 22 settembre) Ccà, c' avìmmo sta accuòrte! Pecché tràttasi 'e perzona seria e rispettàbbile. Chillo ca è nnato sotto 'o segno d 'a Vergine è inteliggènte assaje, e se fa sempe 'e cunte primma 'e ccumincià. In ammore 'o Vergine cchiù ca fà, penza. Ma nun sempe fa buono a penzà tanto… 

 IL SETTIMO SEGNO DELLO ZODIACO NAPOLETANO 
 Bilancia (23 settembre - 22 ottobre) 'E ccose juste 'e ttène dint' 'o sanghe. P' 'a Bilancia l'ago adda sta sempe ammièzo, e si 'nce sta n'appìcceco, sape mettere 'a pace… ma quacche vota ce appizza ‘o suojo… ‘A donna bilancia pierde 'o meglio tiempo pe se fà bella, e si 'a vulite curtiggià, pure vuje ve avite curà. 

L’OTTAVO SEGNO DELLO ZODIACO NAPOLETANO 
 Scorpione (23 ottobre - 22 novembre) 'O Scurpione nun se fà maje a sgamà; è comm' accattà 'a jatta dint’ 'o sacco, e forse è proprio chesto ca attira comm' 'a 'na calamìta. ‘O masculo è "Latin lòver," o pe' dìcere meglio: "rùbbacore." Chesta è 'a parola justa! ‘A femmena …ce sa fà 

 IL NONO SEGNO DELLO ZODIACO NAPOLETANO 
 Sagittario (23 novembre - 21 dicembre) 'A simpatia ca tène 'o Saggittario nunn 'a tène nisciùno, penza sempe 'o bbuono, è sempe cuntento, si 'nce stai vicino ne sì cuntaggiàto. Ma 'a fedeltà nunn 'a cunosce, pirciò, stateve accuòrte. 

 IL DECIMO SEGNO DELLO ZODIACO NAPOLETANO 
 Capricorno (22 dicembre - 20 gennaio) Pròpio tirchio tirchio nunn' è, dicimmo ca è cunservatòre, 'o Capricuòrno sape dà 'o ggiùsto valore 'e ccose, e s' astìpa 'a lira pe' quanno vèneno 'e tièmpe nire. In ammore è 'nu poco diffidente, però quanno sape a isso, se votta a capofitto e quacche vota 'nce resta fregato! 

L’UNDICESIMO SEGNO DELLO ZODIACO NAPOLETANO 
 Acquario (21 gennaio - 19 febbraio) L'Acquario nun se vota maje arèto, va sempe annanze. E' 'nu tipo muderno, e cerca sèmpe 'e ccose nove. E' pure 'nu poco volùbbile, e all'intrasàtte, po’ cagnà penziero. L' Acquario nun se vò sentì 'ncatenato però è sincero e pur' isso vò 'a lealtà. Si s’accuorge d’ ‘a menzogna, po’ lassà tutto senza chiagnere e…s’arricuorda ogne cosa! 

 IL DODICESIMO SEGNO DELLO ZODIACO NAPOLETANO 
 Pesci (20 febbraio - 19 marzo) 'Nce sta 'a ggente brava, ma 'e Pisce, forse, se mètteno â coppa a tutti quante. Primma 'e penzà pe' lloro, pènzano all' ate, e quando 'nce fanno 'na mal'azione, se chiùdeno comme a 'nu riccio. 'E Pisce sò rumàntice, e sònneno cu' l' uòcchie apièrte…puvarielle, ‘e delusione s’ ‘e chiammano!


Nessun commento:

Posta un commento